Azərbaycan

Avropa İttifaqının EU4Digital təşəbbüsü iqtisadiyyatın inkişafına, daha çox yeni iş yerlərinin yaradılmasına, insanların həyat şəraitinin yaxşılaşdırılmasına və müəssisələrə dəstək məqsədilə Aİ-nin standart və təcrübələrinə uyğun olaraq rəqəmsal iqtisadiyyatın və cəmiyyətin əsas sahələrini inkişaf etdirmək üçün bir sıra tədbirlər təklif edərək Azərbaycanda rəqəmsal islahat proqramına dəstək verir.

EU4Digital təşəbbüsünün məqsədi inkişafı və məşğulluğu təşviq etməklə hökumət qurumlarının işini təkmilləşdirmək, iqtisadiyyatın şaxələndirilməsini gücləndirmək və Azərbaycan vətəndaşlarının həyatını yaxşılaşdırmaqdır. EU4Digital vasitəsilə rəqəmsal bazarların uyğunlaşdırılması nəticəsində onlayn xidmətlərin təkmilləşəcəyi, ucuzlaşacağı, eləcə də insanların daha geniş seçimlərdən yararlanacağı gözlənilir.

Rəqəmsal iqtisadiyyatın inkişafı Azərbaycan üçün prioritet məsələdir. Bu ölkədə elektron xidmətlərin mərkəzləşdirilməsi və dövlət xidmətlərinin rəqəmsallaşdırılmasına diqqət yetirilir. Hökumətin sosial-iqtisadi strategiyası prioritet sahələrdə rəqəmsal transformasiyanı nəzərdə tutur.

Azərbaycan 2024-cü ilə qədər əhalinin internetə çıxış imkanını artırmağı planlaşdırır. Məlumatların məxfiliyinə dair qanunvericiliyə diqqət yetirməklə hazırlanmış kibertəhlükəsizlik strategiyası ölkənin rəqəmsallaşmasına dəstək vermək məqsədi daşıyır.

Aİ Dünya Bankı ilə sıx əməkdaşlıq çərçivəsində Azərbaycan üçün Çevik Texniki Yardım Aləti üzrə İnzibati Müqavilə (AZTAF) (2022-ci ildə) layihəsini maliyyələşdirib. Bu üçillik proqram “Ağıllı Kəndlər” və rəqəmsal bağlantı kimi hökumətin prioritetlərinə cavab verəcək və onları dəstəkləyəcək.

Aİ və AYİB Azərbaycanda 280 000-dən artıq ev təsərrüfatının müasir genişzolaqlı internet bağlantısı ilə təmin edilməsini maliyyələşdirir və bunun üçün Şərq Tərəfdaşlığı üzrə İqtisadi və İnvestisiya Planı vasitəsilə 50 milyon ABŞ dolları dəyərində kredit ayırıb. Rəqəmsal İnkişaf və Nəqliyyat Nazirliyi yanında “Aztelekom” şirkəti üçün verilən bu kredit internetin sürətini, bağlantının gücünü və ötürmə qabiliyyətini yaxşılaşdırmaq, eləcə də paytaxt və ucqar rayonlar arasındakı rəqəmsallaşdırma sahəsindəki bərabərsizliyi aradan qaldırmaq üçün şəbəkənin genişləndirilməsinə dəstək verəcək.

Aİ-nin Azərbaycanla əlaqələri haqqında daha ətraflı məlumat üçün baş çəkin:

• EU4Azerbaijan internet səhifəsi
• Avropa İttifaqının Azərbaycandakı Nümayəndəliyinin internet səhifəsi