Gürcüstan

EU4Digital təşəbbüsünün məqsədi Aİ-nin Vahid Rəqəmsal Bazarının faydasını Gürcüstana və digər Şərq Tərəfdaşlığı ölkələrinə qədər genişləndirmək, o cümlədən rəqəmsal iqtisadiyyatın və cəmiyyətin potensialını inkişaf etdirmək üçün Aİ-nin dəstəyini istiqamətləndirməkdir.

Xüsusilə, EU4Digital vasitəsilə Aİ, rouminq tariflərinin azaldılmasında və Aİ-nin rouminq tarifləri ilə daha da uyğunlaşdırılmasında, eləcə də iqtisadiyyatı inkişaf etdirmək məqsədilə yüksək sürətli genişzolaqlı bağlantının inkişafında və tətbiq edilməsində, elektron logistika, səhiyyə, kibertəhlükəsizlik və rəqəmsal bacarıqlar kimi sahələrdə cəmiyyət arasında rəqəmsallaşdırma proseslərinin uyğunlaşdırılmasında Gürcüstanı dəstəkləmək niyyətindədir.

Genişzolaqlı bağlantının inkişafı Aİ-nin EU4Digital təşəbbüsünün əsas prioritetlərindən biridir. Gürcüstan Genişzolaqlı rabitə üzrə strategiyalar layihəsi çərçivəsində 2020-2025-ci il üzrə genişzolaqlı bağlantının inkişafını nəzərdə tutuan strategiyasını tətbiq edib. Aİ normalarına uyğun olaraq genişzolaqlı bağlantının inkişafı üçün genişləndirilmiş normativ-hüquqi bazanın yaradılması və ucqar kənd yerlərində rəqəmsallaşdırma sahəsində bərabərsizliyin aradan qaldırılması ölkə üzrə əsas problemlər kimi müəyyən edilib.

Rəqəmsallaşdırma proqramı həm Gürcüstan hökuməti, həm də Aİ üçün ən əsas prioritetlərdən biridir. Avropa İttifaqı Gürcüstanda rəqəmsal iqtisadiyyatı və cəmiyyəti bir neçə ikitərəfli layihə vasitəsilə dəstəkləyir.

• Aİ və AİB (Avropa İnvestisiya Bankı) Gürcüstanın ucqar ərazilərində internetə sürətli və etibarlı çıxışı təmin etmək üçün milli genişzolaqlı internet şəbəkəsinin genişləndirilməsinə sərmayə qoyur. Ucqar Fiber Şəbəkəsi adlı flaqman layihə rəqəmsal bağlantını dəstəkləyir və bu, Aİ-nin Şərq Tərəfdaşlığı üzrə iqtisadi və investisiya planının əsas sahələrindən biridir.
• Yaxın illərdə baş verən COVID-19 pandemiyası fonunda Aİ ÜST (Ümumdünya Səhiyyə Təşkilatı), UNFPA (Birləşmiş Millətlər Təşkilatının Əhali Fondu), UNICEF (Birləşmiş Millətlər Təşkilatının Uşaq Fondu) və UNOPS (BMT-nin Layihə Xidmətləri Ofisi) ilə birlikdə məsafədən səhiyyə və rəqəmsal səhiyyə həlləri vasitəsilə Gürcüstanda COVID-19 pandemiyasının təsirini minimuma endirmək üçün layihə həyata keçirib. Layihə (2021-2024-ci illəri əhatə edir) ucqar kənd yerlərində rəqəmsal səhiyyə həllərini təşviq etməklə əsas səhiyyə xidmətlərinə çıxışı yaxşılaşdırmaq və pandemiya zamanı səhiyyə sisteminin üzərinə düşən yükü azaltmaq məqsədi daşıyır. Layihənin əsas məqsədi məsafədən səhiyyə həllərini təşviq etmək, səhiyyə sisteminin texniki imkanlarını gücləndirmək və COVID-19 virusunun profilaktikası və məsafədən səhiyyə həlləri haqqında ictimaiyyətin məlumatlılığını artırmaqdır.
• Daha bir mühüm layihə Aİ Ağıllı İqtisadi İnkişaf Naminə adlanır. Layihədə dörd əsas komponent diqqət mərkəzindədir. İlk növbədə, layihənin məqsədi ucqar kənd yerlərində rəqəmsallaşma sahəsindəki boşluqları aradan qaldırmaqla iqtisadi fəallığı stimullaşdırmaq və bacarıqları artırmaqdır. İkinci komponent rəqəmsal bacarıqların inkişafına və qızların və qadınların İKT sahəsində səlahiyyətləndirilməsinə yönəlib. Üçüncü komponent KOB-ların (kiçik və orta sahibkarlıq müəssisələri) rəqəmsal texnologiyalar baxımından inkişafı, dördüncü komponent isə rəqəmsallaşma ilə bağlı strateji siyasətlərin əlaqələndirilməsidir.

Aİ-nin Gürcüstanla əlaqələri haqqında daha ətraflı məlumat üçün baş çəkin:

• EU4Georgia internet səhifəsi
• Avropa İttifaqının Gürcüstandakı Nümayəndəliyinin internet səhifəsi