EU4Digital təşəbbüsünün Elektron ticarət şəbəkəsinin Elektron kommersiya üzrə sürətləndiricisi konkret Şərq Tərəfdaşlığı ölkəsi üzrə yenilənmiş tövsiyələr və Aİ ilə prioritet sahələrdə elektron ticarətin uyğunlaşdırılması üzrə fəaliyyət planları təqdim edir. Təşəbbüs həmçinin ŞT ölkələrinə milli və şirkət səviyyələrində fərdi tövsiyələr, təlimlər və məsləhətlər verməklə Aİ ilə transsərhəd elektron ticarət axınını artıra biləcək texnoloji həlləri sınaqdan keçirir.

Bu fəaliyyətə kiçik və orta sahibkarlıq müəssisələri (KOB-lar) üçün transsərhəd elektron ticarətin təşviqi məqsədilə pilot “milli pavilyon hesabı” daxildir. Aİ-də seçilmiş satış platformalarında dövlətə aid milli hesabların yaradılması vasitəsilə Ermənistan və Ukraynadan olan KOB-lar bu hesablardan əlavə qeydiyyat, sənədləşmə və ya digər tələblər olmadan istifadə edə bilərlər. Bu, onlara öz məhsullarını Aİ-də nümayiş etdirməyə və satmağa imkan verərək qlobal müştəri bazasına qoşulmağa və bizneslərini milli sərhədlərdən kənarda genişləndirməyə şərait yaradır. Bu təşəbbüs iştirakçı ölkələrin KOB-larına öz məhsullarını Aİ bazarında sınaqdan keçirmək, transsərhəd satışları artırmaq və potensial olaraq öz ölkələrində layihələrin gələcək inkişafı üçün baza yaratmaq imkanı verir.

Bundan əlavə, Elektron kommersiya sürətləndiricisinin məsləhət mərkəzində Şərq Tərəfdaşlığı ölkələrindən seçilmiş KOB-lar üçün ekspertlər qrupu tərəfindən qrup şəklində təlimlər və fərdi konsultasiyalar  həyata keçirilir. Bu, onlara pavilyon hesabı yaratmağa ehtiyac olmadan Avropanın seçilmiş satış platformalarında satışa başlamaq imkanı yaradır. Elektron kommersiya sahəsində fəaliyyət göstərən KOB-ların əhatə dairəsini genişləndirmək üçün EU4Digital proqramı həmçinin elektron tədris vasitəsilə Aİ-nin əsas satış platformalarında bacarıqların təkmilləşdirilməsi yollarını araşdırır. Burada məqsəd Şərq Tərəfdaşlığı regionunda elektron kommersiya ekosisteminin inkişafına uzunmüddətli təsir göstərməkdir.