HACK COVID-19: qlobal hakatonuna qeydiyyat başladı

10-12 aprel tarixlərində bütün dünyada çalışan texnologiya fəallarının iştirakı ilə “HACK COVID-19” adlı qlobal miqyaslı virtual hakaton keçiriləcək. Sözügedən hakaton Azərbaycan Respublikasının Nəqliyyat, Rabitə və Yüksək Texnologiyalar Nazirliyi, BMT-nin İnkişaf Proqramı və SUP.VC sürətləndirmə mərkəzinin birgə dəstəyi ilə keçirilir. 

Qlobal virtual hakaton müsabiqəsinin məqsədi koronavirus pandemiyasına (COVID-19) qarşı mübarizədə texnoloji həllərdən birgə istifadə etməkdir.

Birlikdə həll edilməsi tələb olunan əsas problemlərdən bəziləri bunlardır:

1) Aztəminatlı və risk altında olan şəxslərə dəstək

2) Texnologiya və sağlamlıq

3) KOM-lara dəstək

4) Fiziki məsafənin saxlanılması və sosial bağlılıq

5) Maarifləndirmə işinin, davranışların və ictimai məsləhət xidmətinin yaxşılaşdırılması

6) Texnologiya və təhsil

7) Texnologiya və texnika

8) Gündəlik həyat üçün texnologiya

Məqsəd, insanların virtual aləmdə işlərini təşkil etməsi, təhsil alması, şəbəkələr qurması, ticarət əlaqələri arasındakı boşluğu aradan qaldırması, mövcud potensialı müəyyən etməsi və real nəticələr əldə etməsi üçün zəruri mühit yaratmaqdır.

Müsabiqədə qeydiyyat İngilis dilindədir və bu gündən başlayır. İştirakçı olmaq istəyən şəxslər www.hackcov19.com internet səhifəsində qeydiyyatdan keçməlidirlər. Qeydiyyat 9 aprel 2020-ci il Bakı vaxtı ilə saat 21:00-da bitəcək.

Qalibi 5000, ikinci yeri tutan şəxsi 3000, üçüncü yeri tutan şəxsi isə 2000 ABŞ dolları mükafat gözləyir. Mükafatlar qaliblərin bank hesablarına göndəriləcək.

Koronavirus: Avropa İttifaqı özünün Şərqi tərəfdaşlarına dəstək nümayiş etdirir