Oktyabr ayı Avropada Kibertəhlükəsizlik (ECSM) ayı kimi qeyd olunur. 2020-ci ildə təşkil olunan kampaniya, davranışlarda dəyişikliklərə olan ehtiyacın aradan qaldırılması və istifadəçilərə yeni texnologiyalarla bağlı riskləri tanımağa kömək etmək imkanları kimi fərqli mövzuları əhatə edir.

Hər il oktyabr ayı boyunca Avropada rəqəmsal təhlükəsizliyi və kiber gigiyena qaydalarını təşviq etmək məqsədilə konfranslar, seminarlar, təlim sessiyaları, virtual seminarlar, təqdimatlar və bir çox başqa tədbirlər daxil olmaqla yüzlərlə fəaliyyət həyata keçirilir.

“Klikləmədən öncə düşün” (#ThinkB4Uclick) “ECSM 2020”-nin rəsmi şüarıdır. Bu il oktyabr ayında baş tutacaq kampaniyanın proqramına insanlara kiber təhdidləri müəyyənləşdirməyə və onlara hazır olmağa kömək etmək məqsədilə iki mövzu daxildir.

“Rəqəmsal bacarıqlar” adlı birinci mövzuda, iştirakçılara şəxsi məlumatların qorunması, kiber qısnama və kiber təcavüz kimi elektron məxfilik məsələləri barədə məlumat verilir.

“Kiber dələduzluq” adlı ikinci mövzu, fişinq, korporativ yazışmalara müdaxilə və onlayn alış-verişlərlə bağlı dələduzluq kimi mövcud və potensial kiber təhdidləri əhatə edir.

ECSM kampaniyası Avropa İttifaqının Kibertəhlükəsizlik Agentliyi (ENISA) və Avropa Komissiyası tərəfindən koordinasiya olunur və Aİ-yə üzv ölkələr, eləcə də Avropada və onun xaricində yerləşən yüzlərlə tərəfdaş (hökumətlər, universitetlər, analitik mərkəzlər, QHT-lər, peşəkar birliklər, özəl sektorda çalışan müəssisələr) tərəfindən dəstəklənir.

ENISA, bütün iştirakçı üzv dövlətlər və Aİ qurumları üçün “mərkəz” rolunu oynayır, eləcə də ekspert təklifləri təqdim etməklə, sinerjilər yaratmaqla və Aİ vətəndaşları, müəssisələri və dövlət orqanları arasında vahid mesajlaşmanı təşviq etməklə ECSM kampaniyasının təşkilini koordinasiya edir. Sözügedən qurum həmçinin yeni materiallar dərc edir və kibertəhlükəsizlik ilə əlaqədar müxtəlif mövzularda mütəxəssis məsləhətləri verir.

Daha çox öyrən https://cybersecuritymonth.eu