გააციფრულე შენი ბიზნესი: ევროკავშირი სოფლად მომუშავე მეწარმეებს საქართველოში ციფრულ ბიზნეს-ინკუბაციის შესაძლებლობას სთავაზობს

  • თარიღი: 16/09/21
  • გააზიარეთ:

ევროკავშირი (EU) და გაეროს განვითარების პროგრამა (UNDP) სოფლად მომუშავე მეწარმეებს საქართველოს დედოფლისწყაროს, ყაზბეგის, ლაგოდეხის და თეთრიწყაროს მუნიციპალიტეტებიდან პროექტის „გააციფრულე შენი ბიზნესი“ მესამე რაუნდში მონაწილეობის მისაღებად იწვევენ.

კონკურსის შედეგად შერჩეული რვა მეწარმე გაივლის ბიზნეს-ინკუბაციის და მენტორობის პროგრამას, რომელიც მათ ციფრული ბიზნესის ინსტრუმენტების პრაქტიკულ გამოყენებაში დაეხმარება.

ინკუბაციის და მენტორობის პროგრამა გულისხმობს ტრენინგს და კონსულტაციებს მრავალ სხვადასხვა საკითხზე, რომლებიც ბიზნესის განვითარებას და ციფრულ ტექნოლოგიებს უკავშირდება, კერძოდ: ბიზნესის შექმნა და მართვა, ბრენდინგი, დიზაინი, ონლაინ მარკეტინგი, ონლაინ გაყიდვები, კომუნიკაცია, კორპორაციული ვებგვერდების შექმნა, ციფრული საშუალებები და შესაძლებლობები. გარდა ამისა, პროგრამა ითვალისწინებს სოფელში მომუშავე მეწარმეების ხელშეწყობას მათი ბიზნესისთვის ვებგვერდების და სხვა ციფრული პლატფორმების შექმნაში.  

ინიციატივას განახორციელებენ ქართული ორგანიზაციები „ჯეოლაბი“, ინოვაციის მხარდაჭერის ფონი და „გერგარტი“ ევროკავშირის დაფინანსებული უფრო ვრცელი სოფლისა და სოფლის მეურნეობის განვითარების ევროპის სამეზობლო პროგრამის (ENPARD) ფარგლებში.  

ინკუბაციის პროგრამით გრძელდება გასული წლის ზაფხულში სასოფლო ბიზნესისთვის ჩატარებული საგანმანათლებლო და ქსელური აქტივობის ციკლი. გასული წლის ციკლი მოიცავდა ონლაინ კონფერენციას ივლისში, რომელსაც 120 მონაწილეზე მეტი დაესწრო, და ბიზნესის ციფრული გარდაქმნის ტრენინგს აგვისტოში, რომელშიც 60-ზე მეტმა სოფლად მომუშავე მეწარმემ მიიღო მონაწილეობა.

ინკუბაციის პროგრამაში მონაწილეობით დაინტერესებულ მეწარმეებს იწვევენ რეგისტრაციის გასავლელად 2021 წლის 18 სექტემბრამდე მოცემულ ბმულზე.

პრესრელიზი


ახალი ამბები

იხილეთ ყველა