საინფორმაციო და საკომუნიკაციო ტექნოლოგიური ინოვაციები უდავოდ გადამწყვეტ როლს ასრულებს ციფრულ ეპოქაში: რამდენად შეესაბამება აღმოსავლეთ პარტნიორობის ქვეყნების ინოვაციის ეკოსისტემები ევროკავშირის ინოვაციის ეკოსისტემებს?

ბოლო წლებში აღმოსავლეთ პარტნიორობის ქვეყნებმა ბევრი გააკეთეს საკუთარი ინოვაციის ეკოსისტემების მშენებლობისთვის; ამოქმედდა უამრავი ჰაბი, აქსელერატორი და სტარტაპი, დაინერგა ბიზნესის მხარდაჭერის პროგრამები. მიუხედავად ამისა, ჯერ კიდევ არსებობს ეკოსისტემის აქტორების პოტენციალთან დაკავშირებული ხარვეზები, რაც აფერხებს სტარტაპების და მცირე და საშუალო საწარმოების მზარდი საჭიროებების მომსახურებას. რესურსების ნაკლებობა, რომელიც საჭიროა ეკოსისტემის გაფართოების და ინოვაციის მხარდამჭერი აქტორების სპეციალიზაციისთვის აღმოსავლეთ პარტნიორობის ქვეყნებში, ქმნის ბარიერს ამ ქვეყნების მდგრადი განვითარების და ეკოსისტემის სათანადო საქმიანობისთვის. ხოლო ევროკავშირის ქვეყნებში, რომლებმაც მემკვიდრეობით მიიღეს ბიზნესის მხარდაჭერის მძლავრი სისტემა და უხვი რესურსები ეკოსისტემის მშენებლობისთვის ბაზრის მზარდი მოთხოვნების შესაბამისად, ეკოსისტემის განვითარება სწრაფად წავიდა წინ.

პროგრამის EU4Digital I ფაზაში საინფორმაციო და საკომუნიკაციო ტექნოლოგიური ინოვაციების თემატურმა სფერომ ჩაატარა ბაზრის კვლევა, რომლის ფარგლებში ერთმანეთს შეადარეს სტარტაპის ეკოსისტემის საქმიანობის მაჩვენებლები სხვადასხვა ქვეყნებში. ამ პროცესმა გამოავლინა, რომ გარდაქმნის მაჩვენებლები სტარტაპის განვითარების ეტაპებს შორის აღმოსავლეთ პარტნიორობის ქვეყნებში 70%-ით ჩამოუვარდებოდა ცენტრალური და აღმოსავლეთ ევროპის ქვეყნებს. საქმიანობის მაჩვენებლების გასაუმჯობესებლად ინიციატივის II ფაზა ფოკუსირებულია კონკრეტულ ხარვეზებზე აღმოსავლეთ პარტნიორობის ქვეყნების სტარტაპებსა და ინოვაციის ეკოსისტემებში, ინტერვენციის მიზნობრივი სტრატეგიების შემუშავებაზე, და უზრუნველყოფაზე პლატფორმით, რომელიც ეკოსისტემის განვითარების კარტირებას და მონაცემებით მხარდაჭერილი პოლიტიკის დასახვას მოემსახურება. ინიციატივა EU4Digital მიზნად ისახავს ინოვაციის მძლავრი და ინკლუზიური ეკოსისტემის ხელშეწყობას, რომელშიც ხაზგასმულია ეკოსისტემის მშენებელთა გადამწყვეტი როლი და პარტნიორული ურთიერთობების მნიშვნელობა საჯარო და კერძო სექტორებს შორის. ეს თავის მხრივ აძლიერებს მაღალმწარმოებლურ საინკუბაციო პროგრამებს, რომლებიც უზრუნველყოფს ცოდნაზე, ბაზრებზე, კაპიტალზე და სხვა საოპერაციო რესურსებზე წვდომას.