Վրաստան

EU4Digital-ը նպատակ ունի Եվրոպական միության միասնական թվային շուկան ընդլայնել դեպի Վրաստան եւ Արեւելյան գործընկերության այլ երկրներ՝ ԵՄ աջակցությունն ուղղորդելով թվային տնտեսության եւ հասարակության ներուժի զարգացման ուղղությամբ։

Մասնավորապես, EU4Digital-ի միջոցով ԵՄ-ն Վրաստանին կաջակցի ռոումինգի սակագների իջեցման ու հետագայում Եվրոպական միության ռոումինգի սակագների հետ դրանց ներդաշնակեցման, տնտեսության խթանման համար գերարագ լայնաշերտ ցանցի մշակման եւ ներդրման, ինչպես նաեւ հասարակությունում թվային կառուցակարգերի ներդաշնակեցման գործընթացներին՝ լոգիստիկայից մինչեւ էլեկտրոնային առողջապահություն, կիբերանվտանգություն ու թվային հմտություններ:

Լայնաշերտ կապի զարգացումը ԵՄ «EU4Digital» նախաձեռնության գլխավոր առաջնահերթություններից է: «Լայնաշերտ կապի ռազմավարություններ» ծրագրի շրջանակում Վրաստանը ներկայացրել է իր լայնաշերտ կապի զարգացման 2020-2025 թթ. ռազմավարությունը, որտեղ որպես հիմնական նպատակներ են սահմանվում ԵՄ նորմերին համապատասխան լայնաշերտ կապի զարգացման համար ընդլայնված իրավակարգավորող դաշտի ստեղծումը եւ գյուղական բնակավայրերում թվային անջրպետի հաղթահարումը:

Թվային օրակարգը առանցքային առաջնահերթություն է ինչպես Վրաստանի կառավարության, այնպես էլ ԵՄ-ի համար։ Եվրոպական միությունն աջակցում է Վրաստանի թվային տնտեսությանը եւ հասարակությանը մի քանի երկկողմ ծրագրերի միջոցով։

• ԵՄ-ն եւ ԵՆԲ-ն (Եվրոպական ներդրումային բանկ) ներդրումներ են կատարում ազգային լայնաշերտ ցանցի ընդլայնման ուղղությամբ՝ Վրաստանի գյուղական շրջաններն արագ եւ հուսալի ինտերնետ ծառայություններով ապահովելու համար: Գյուղական բնակավայրերը մանրաթելային ցանցով ապահովելուն ուղղված այս ծրագիրն աջակցում է թվային միակցվածությանը, որն Արեւելյան գործընկերության համար ԵՄ տնտեսական եւ ներդրումային պլանի առանցքային ոլորտներից մեկն է:
• Վերջերս բռնկված ՔՈՎԻԴ-19 համավարակի լույսի ներքո ԵՄ-ն ԱՀԿ-ի (Առողջապահության համաշխարհային կազմակերպություն), ՄԱԲՀ-ի (ՄԱԿ-ի բնակչության հիմնադրամ), ՅՈՒՆԻՍԵՖ-ի (ՄԱԿ-ի մանկական հիմնադրամ) եւ UNOPS-ի (Միավորված ազգերի կազմակերպության ծրագրային ծառայությունների գրասենյակ) հետ համատեղ սկսել է ծրագիր՝ հեռաբժշկության եւ թվային առողջապահական լուծումների միջոցով նվազագույնի հասցնելու ՔՈՎԻԴ-19-ի ազդեցությունը Վրաստանում։ Ծրագիրը (2021-2024թթ.) նպատակ ուներ բարելավել առողջապահական հիմնական ծառայությունների հասանելիությունը եւ նվազեցնել առողջապահական համակարգի ծանրաբեռնվածությունը համավարակի ժամանակ՝ գյուղական բնակավայրերում առողջապահական թվային լուծումները խթանելու միջոցով: Հիմնական նպատակներն են հեռաբժշկության լուծումների խթանումը, առողջապահական համակարգի տեխնիկական կարողությունների հզորացումը եւ ՔՈՎԻԴ-19-ի կանխարգելման եւ հեռաբժշկության լուծումների վերաբերյալ հանրային իրազեկվածության բարձրացումը:
• Առանցքային նշանակություն ունի նաեւ «ԵՄ-ը՝ հանուն խելացի տնտեսական զարգացման» երկկողմ ծրագիրը: Այն կենտրոնանում է չորս հիմնական բաղադրիչների վրա։ Առաջինը տնտեսական ակտիվության եւ կարողությունների զարգացման վրա կենտրոնացումն է՝ գյուղական բնակավայրերում թվայնացման բացը վերացնելու միջոցով: Երկրորդ բաղադրիչը կենտրոնանում է թվային հմտությունների բարելավման եւ ՏՀՏ ոլորտում աղջիկների ու կանանց կարիերայի զարգացման վրա: Երրորդը կենտրոնանում է ՓՄՁ-ների (փոքր եւ միջին ձեռնարկություններ) թվային աճի, իսկ չորրորդը՝ թվայնացման ոլորտում ռազմավարական քաղաքականության համակարգման վրա:

Վրաստանի հետ ԵՄ-ի հարաբերությունների մասին ավելին իմանալու համար այցելեք՝

• EU4Georgia վեբկայք.
• Վրաստանում Եվրոպական միության պատվիրակության վեբկայք։