քարտեր

2. Այսպիսով, ի՞նչ է անում EU4Digital-ն՝ Արևելյան գործընկերության տարածաշրջանում էլեկտրոնային առևտրի խթանման ուղղությամբ

Որպես EU4Digital-ի մաս, մի շարք գործողություններ և պիլոտային ծրագրեր աջակցում են միջսահմանային համագործակցությանը: Ուշադրության կենտրոնում էլեկտրոնային առևտրի հետևյալ ոլորտների ներդաշնակեցումն է.

• Միջսահմանայինէլեկտրոնայինառևտուր. տարբեր երկրներից առևտրային գործընկերների (օրինակ ՝ բիզնեսների և կառավարության) միջև անթուղթ փաստաթղթաշրջանառություն.
• Էլեկտրոնայինմաքսայինծառայություններ. լոգիստիկ ընկերությունների և մաքսային մարմինների միջև մաքսային տեղեկատվության համակարգված ու ավտոմատացված փոխանակում (օր.՝ նախաժամանումային տեղեկատվության փոխանակում, ռիսկերի գնահատում, տվյալների համապատասխանեցում, մաքսային հսկողության արդյունքներ).
• Թվայինտրանսպորտայինմիջանցք. ֆիզիկական տրանսպորտային միջանցքների շրջանում տվյալների հետ կապված ծառայություններ` փոխադրման բոլոր մակարդակներում (օդային, ճանապարհային, երկաթուղային և ծովային) միջանցիկ տեղեկատվության փոխանակման համար.
• էլեկտրոնայինկոմերցիա. ապրանքների վաճառք համակարգչային ցանցերում իրականացվող էլեկտրոնային գործարքների միջոցով:
• Նեթվորքինգ. Արևելյան գործընկերության երկրների շահագրգիռ կողմերի ներգրավում ԵՄ-ի գործընկերների հետ գործարար կապերի զարգացման ու էլեկտրոնային առևտրի ոլորտային միտումների, գործողությունների և ներկա իրադրության մասին տեղեկատվության փոխանակման գործընթացում:

3. Ի՞նչ է իրենից ներկայացնում միջսահմանային էլեկտրոնային առևտրի պիլոտավորումը: Ո՞ր երկրներն են ներգրավված դրանում և կոնկրետ ինչո՞վ է այն զբաղված: Կարո՞ղ ենք ակնկալել, որ առաջիկա տարիներին դրա օգուտները կտարածվեն բոլոր երկրներում

Պիլոտային գործողության նպատակը մի շարք պետական և մասնավոր սուբյեկտների միջև տվյալների անդրսահմանային փոխանակման փորձարկումն է՝ օգտագործելով էլեկտրոնային տվյալների և փաստաթղթերի անվտանգ փոխանակման խողովակ հանդիսացող էլեկտրոնային առաքման լուծումը։ Նպատակն է պարզել՝ արդյոք տվյալների նմանատիպ փոխանակումը կարող է լիարժեք գործառնել՝ ելնելով հետևյալ հեռանկարներից.

• Տեխնիկական. փորձարկել՝ հնարավոր է արդյոք հասնել փոխգործելիության, և արդյոք գոյություն ունեն անդրսահմանային մակարդակում տվյալ լուծման օգտագործմանը խոչընդոտող տեխնիկական արգելքներ.
• Իրավական. իրավական միջավայրի նախնական գնահատում՝ իրավական տեսանկյունից լուծումը լիարժեք օգտագործելու համար ազգային օրենսդրության մեջ անհրաժեշտ փոփոխությունները բացահայտելու նպատակով.
• Կազմակերպական. հստակեցնել ինչպես ազգային, այնպես էլ անդրսահմանային մակարդակում լուծման լիարժեք գործառնման ապահովման համար պատասխանատու հաստատությունները և պահանջվող կազմակերպական/ինստիտուցիոնալ փոփոխությունները։

Պիլոտային ծրագրի ավարտից հետո «EU4Digital» նախաձեռնության թիմը ներկայացրել է վերոնշյալ ոլորտներում պահանջվող փոփոխությունների վերաբերյալ առաջարկություններ` լուծման լայնամասշտաբ ներդրման և դրա լիարժեք գործառնության ապահովման, ինչպես նաև այն իրավականորեն պարտադիր դարձնելու նպատակով:

Իրականացվել են էլեկտրոնային առաքման երկու պիլոտային ծրագրեր, որոնցից մեկն արևելյան գործընկեր երկրի և ԵՄ անդամ պետության, իմա՝ Ուկրաինայի և Լեհաստանի միջև, իսկ մյուսը՝ արևելյան գործընկեր երկու երկրների, իմա՝ Հայաստանի և Ուկրաինայի միջև: Իմացիր, թե ինչպես է էլեկտրոնային առաքման լուծումը փորձարկվել Ուկրաինայում. «Հաղթահարելով թղթային շղթան. ԵՄ-ն թվային ճանապարհը է բացում Ուկրաինայում առևտրի համար»։ 

Գործընկեր երկրների ներկայացուցիչների համար կազակերպվել են նաև վիրտուալ ճանաչողական այցեր` պիլոտային լուծումների հետ ծանոթանալու նպատակով, որոնք նրանց օգնել են իրենց երկրներում հատուկ լուծումների կիրարկման առնչությամբ տեղեկացված որոշումներ կայացնելիս։

4. Ի՞նչ է իրենից ներկայացնում էլեկտրոնային մաքսային ծառայությունների համակարգը, և ինչպիսի՞ օգուտներ կան դրանից

Էլեկտրոնային մաքսային ծառայությունների համակարգը (eCustoms) տնտեսվարողների և մաքսային մարմինների միջև մաքսային տեղեկատվության համակարգված ու ավտոմատ փոխանակումն է (օր.՝ դատարկ բեռնատարների, ռիսկերի գնահատման, տվյալների համապատասխանեցման, մաքսային հսկողության արդյունքների մասին տեղեկատվության փոխանակումը):

Երբ տնտեսվարողներն իրականացնում են սահմանների միջև ապրանքների տեղափոխում և շփվում են մաքսային մարմինների հետ, նրանք առնչվում են ավտոմատացման և մաքսային մարմինների միջև ժամանակին հաղորդակցության բացակայության պատճառով առաջացող ուշացումների հետ: Արդյունքում, վերջնական գնորդները ևս առնչվում են ուշացումների հետ՝ իրենց ապրանքները ձեռք բերելիս: Դա տեղի է ունենում, քանի որ.

• Մաքսային տեղեկատվությունը ժամանակին տեղ չի հասնում՝ անվտանգային ռիսկերի անարդյունավետ կառավարման խնդիրներ ստեղծելով մաքսային մարմինների և բիզնեսների համար.
• Ներդրված չէ տվյալների ավտոմատ համադրման համակարգ (օր.՝ համադրել, թե արդյոք մեկնման երկրում հայտարարագրված տեղեկատվությունը նույնն է, ինչ ժամանման երկրում).
• Նախաժամանումային տեղեկատվության փոխանակում տեղի չի ունեցել (օր.՝ երբ բեռը հասնում է սահմանային անցակետ, փոխադրողը պետք է նախքան սահմանն անցնելը սպասի, մինչև ռիսկի գնահատումը ավարտվի):

eCustoms-ն օգնում է միջամտել նշված խնդիրներին՝ տեղեկատվության արդյունավետ փոխանակումը հնարավոր դարձնող համագործակցության անհրաժեշտ մոդելներ տրամադրելով բիզնեսներին ու կառավարություններին (օր.՝ համագործակցության գործընթացներ, հաղորդակցության համակարգեր): Այն լավարկում է մաքսային մարմինների հետ փոխգործակցությունը` նվազեցնելով բիզնեսի համար ծախսերն ու բարձրացնելով ապրանքների և ծառայությունների առաքման արագությունը:

«EU4Digital» նախաձեռնությունը վերլուծեց առկա լուծումներն ու տարածաշրջանում դրանց կիրառելիությունը և eCustoms-ի պիլոտավորման համար որպես լավագույն տարբերակ ընտրեց «SEED» (էլեկտրոնային տվյալների համակարգված փոխանակում) լուծումը: ԵՄ-ի կողմից ֆինանսավորվող SEED-ն իրականացվում է Արևմտյան Բալկանյան երկրների մաքսային մարմինների կողմից՝ առաջարկելով.

• Ապացուցված անվտանգություն.
• Տվյալների ստանդարտներ.
• Ազգային համակարգերին հեշտ հարմարվողականություն.
• Ճկունություն՝ գործառնությունների և տվյալների շտեմարանների փոխանակման նկատամամբ պահանջների առումով:

Արևմտյան Բալկաններում SEED-ը հաջողությամբ լուծել է հետևյալ խնդիրները.

• Հաշիվ-ապրանքագրերի փոփոխման և մուտքի պահին մաքսային արժեքի նվազեցման միջոցով թերարժևորում.
• Բեռնված բեռնատարների ելքի կեղծ հաստատում (ԱԱՀ-ի վերադարձի հետ կապված խախտումներ).
• Տրանսպորտային փաստաթղթերի (օր.՝ ներմուծման գրքույկների (APA Carnet)) (սխալ) օգտագործման հետ կապված խախտումներ.
• Մաքսային օրինախախտման լուրջ դեպքերի հայտնաբերում, ինչպիսիք են ծխախոտի և թմրանյութերի մաքսանենգությունը:

Պիլոտային ծրագրի նպատակն Արևելյան գործընկերության երկրների և ԵՄ անդամ պետությունների մաքսային մարմինների միջև էլեկտրոնային մաքսային տվյալների փոխանակման ապահովումն է: Սա մեկնարկային կետն է, երբ պիլոտավորվում են նախնական (սահմանափակ) գործառույթներ ու տվյալների հավաքածուներ:

eCustoms-ի պիլոտային տարբերակն արդեն հաջողությամբ փորձարկվել է Բելառուսի և Լիտվայի մաքսային մարմինների միջև: Իմացիր ավելին՝ «Գործարկվել է Բելառուսի և Լիտվայի միջև արտահանման տվյալների փոխանակման պիլոտային ծրագիրը»:

Պիլոտավորումը նպաստում է մաքսային մարմինների միջև մաքսային տվյալների փոխանակման գործընթացի բարելավմանը, առաջընթաց է արձանագրում մաքսային ձևակերպումների լավարկման, ռիսկերի գնահատման ու անդրսահմանային մաքսային մարմինների միջև համագործակցության ապահովման ուղղությամբ: Որպես արդյունք՝ ներկայացվել են առաջարկություններ, որոնք ուղղված են լուծումների լայնամասշտաբ ներդրմանը և վերարտադրությանը ամբողջ տարածաշրջանում։

5. Թվային տրանսպորտային միջանցք՝ Բալթիկ ծովից մինչև Սև ծով. հավակնոտ է հնչում, բայց ի՞նչ է այն նշանակում առարկայորեն, և ինչպե՞ս է օժանդակելու առևտրի իրականացմանը

Թվային տրանսպորտային միջանցքը (ԹՏՄ) տվյալների հետ կապված ծառայությունների շարք է, որը ներդրվել է ֆիզիկական անդրսահմանային տրանսպորտային միջանցքներում` փոխադրումների բոլոր մակարդակներում (օդային, ճանապարհային, երկաթուղային և ծովային) տեղեկատվության միջանցիկ փոխանակման համար: Սա ներառում է մատակարարման ցանցի շահագրգիռ կողմերի համար այնպիսի ծառայություններ և հավելվածներ, ինչպիսիք են՝ իշխանության մարմիններին տեղեկատվության ներկայացումը, տեսանելիության ծառայությունները, շուկայի ծառայությունները, ամրագրման և պատվիրման ծառայություններն ու շղթայի կազմման ծառայությունները:

Սահմանով ապրանքներ և ծառայություններ տեղափոխելիս լոգիստիկ ընկերությունները փոխազդում են Արևելյան գործընկերության ու ԵՄ տարբեր երկրների տարատեսակ լոգիստիկ համակարգերի հետ: Սա ստեղծում է տեխնիկական խոչընդոտներ, որոնք բարդացնում են երկրների միջև լոգիստիկ տեղեկատվության ակնթարթային փոխանակումը: Բացի այդ, լոգիստիկ գործընթացների և տեղեկատվական համակարգերի համար մշակված իրավական շրջանակները նույնը չեն այդ երկրներում, ինչն էլ ավելի է երկարացնում ու բարդացնում լոգիստիկ գործընթացները: Սա լոգիստիկ ծախսերի ավելացման և ապրանքների ու ծառայությունների մատակարարման ուշացումների պատճառ է դառնում:

Բալթիկ և Սև ծովերի միջև թվային տրանսպորտային միջանցքը պետք է օգնի լոգիստիկ գործընթացներն ու էլեկտրոնային տրանսպորտային տվյալների հոսքը կազմակերպել այնպես, որ տեղեկատվությունը փոխանակվի անմիջապես լոգիստիկ շղթայի մասնակիցների (առևտրով զբաղվողներ, բեռնառաքողներ, մաքսային մարմիններ, պետական այլ գործակալություններ և սպառողներ) միջև՝ լավարկելով ապրանքների և ծառայությունների հոսքն ու խնայելով ժամանակ և գումար:

Լոգիստիկ տեղեկատվության փոխանակումը հեշտացնելու և ներդաշնակեցնելու նպատակով ԵՄ-ն ընդունել է Բեռնափոխադրումների էլեկտրոնային տեղեկացման (eFTI) մասին կանոնակարգը և մշակել օժանդակ իրավական ակտեր / պարզաբանումներ, որոնց պետք է հետևեն ԵՄ անդամ պետությունները՝ շարժվելով դեպի հարթակների ապակենտրոնացված դաշնային ցանց՝ ապոհվելով պետական մարմինների կողմից էլեկտրոնային տվյալների օրինականության ճանաչումը:

EU4Digital-ը մշակել է նախապատրաստական գործողություններ՝ ադապտացնելով Արևելյան գործընկերության երկրներում ԵՄ-ի մշակումները, որոնք ուղղված են նշված երկրների ներսում և դրանց միջև տեղեկատվության փոխանակման, կարգավորիչ միջավայրի ու կազմակերպական մեխանիզմների համար տեխնոլոգիական մոտեցման գործածման փորձարկմանը: Այս համատեքստում փորձագետները մշակել են Բալթիկ և Սև ծովերի միջև թվային տրանսպորտային միջանցքի ստեղծման եռամյա ծրագիր և սահմանել են այդ ուղղությամբ նախապատրաստական գործողությունները։ Իրականացվող ծրագիրը նպատակ ունի լոգիստիկ տեղեկատվության փոխանակման անխափան համակարգ ստեղծել Բալթիկ և Սև ծովերի միջև տրանսպորտային միջանցքի կամ տարածաշրջանի այլ մասերի երկայնքով։

6. Որո՞նք են էլեկտրոնային կոմերցիայի հիմնական խոչընդոտները, և ի՞նչ է անում EU4Digital-ը` որպես օգնություն

Էլեկտրոնային կոմերցիան կամ eCommerce-ը համակարգչային ցանցերում իրականացվող էլեկտրոնային գործարքների միջոցով ապրանքների վաճառքն է: Չնայած ԵՄ-ն միասնական շուկա է, որն ապրանքների և ծառայությունների ազատ փոխանակում է թույլ տալիս անդամ պետությունների միջև, բայց դա հնարավոր չէ հեշտությամբ իրականացնել նաև ԵՄ-ի ու Արևելյան գործընկերության երկրների միջև՝ էլեկտրոնային կոմերցիայի օրենսդրության, չափորոշիչների և էկոհամակարգի տարբերությունների պատճառով:

Օրինակ՝ աշխարհի ցանկացած կետի հետ առևտուր անող ԵՄ բիզնեսները ցանկանում են վստահ լինել, որ ապրանքները համապատասխանում են անվտանգության ընդհանուր պահանջներին, բայց հանդիպում են խոչընդոտների՝ պայմանավորված այն փաստով, որ ԵՄ-ում և Արևելյան գործընկերության երկրներում գործող չափորոշիչներն ու օրենսդրությունը ներդաշնակված չեն:

Բացի այդ, ԵՄ-ն 2021 թվականին ներկայացրեց էլեկտրոնային կոմերցիան ԱԱՀ-ով հարկելու նոր փաթեթը: Այս լայնածավալ բարեփոխումն ազդում է էլեկտրոնային կոմերցիայի գործընթացների վրա ողջ Եվրոպայում և անդին, իսկ բիզնեսներն ու կառավարությունները սահմանափակ են տեղեկացված դրա ազդեցության մասին: Այս նոր իրականության պայմաններում արևելյան գործընկեր երկրներն ունեն էլեկտրոնային կոմերցիայի ուղղությամբ շարժվելու և դրան հարմարվելու աջակցության կարիք։

EU4Digital-ն էլեկտրոնային կոմերցիայի ոլորտում իր գործունեության շրջանակներում Արևելյան գործընկերության երկրներին տրամադրում է ԵՄ-ի հետ հարթ էլեկտրոնային առևտրի հասնելու վերաբերյալ խորհուրդներ՝ կենտրոնանալով երեք ոլորտների ներդաշնակեցման վրա։ Մասնավորապես՝

• Օրենսդրություն.
• Չափորոշիչներ.
• Էլեկտրոնային կոմերցիայի էկոհամակարգ։

Այս առաջարկությունների նպատակն է.

• Վերացնել անդրսահմանային էլեկտրոնային կոմերցիայի խոչընդոտները.
• Ավելացնել անդրսահմանային էլեկտրոնային կոմերցիայի ծավալները.
• Բարձրացնել գործընկեր երկրների իրազեկությունը և նրանց պատրաստել էլեկտրոնային կոմերցիայի ոլրտում ԵՄ-ի իրականացրած 2021 թվականի փոփոխություններին:

ԵՄ-ին և արևելյան գործընկեր երկրներին առավելագույն օգուտ բերելու համար վերլուծությունն օգտագործվել է կոնկրետ մարտահրավերները բացահայտելու և այդ մարտահրավերներին դիմակայելուն ուղղված պիլոտային լուծում մշակելու և գործարկելու համար: Որպես արդյունք՝ EU4Digital-ը գործարկեց էլեկտրոնային կոմերցիայի պիլոտային ծրագիրը՝ ազգային վիրտուալ պահեստներ հիմնելով երեք պիլոտային երկրներում՝ Հայաստանում, Ադրբեջանում և Վրաստանում, որպեսզի աջակցի մանրածախ առևտրով զբաղվողներին, առևտրային հարթակներին, առաքման օպերատորներին և մաքսային մարմիններին՝ ապրանքները արտասահմանում վաճառքի հանելու և անդրսահմանային առաքումը հեշտացնելու գործում:

Վիրտուալ պահեստը գրանցում է էլեկտրոնային կոմերցիայով վաճառքի համար նախատեսված ապրանքների մասին տվյալները՝ ԵՄ և միջազգային պահանջներին համապատասխանող ձևաչափով: Պահեստ մուտք գործելուց հետո ապրանքները կարող են վաճառվել ցանկացած թվով միջազգային առցանց առևտրային հարթակներում, ինչպիսիք են eBay-ը կամ Etsy-ն, իսկ ստանդարտացված տվյալներն էլ փոստային ծառայություններին թույլ են տալիս սկսել առաքումը և ապահովում են անխափան անդրսահմանային մաքսային ընթացակարգեր:

Իմացիր ավելին՝ էլեկտրոնային կոմերցիայի պիլոտային ծրագրի մասին.

Հայկական գուլպաների վաճառք Գերմանիայում. «EU4Digital»-ը՝ eCommerce-ի միջոցով ԵՄ շուկան մոտեցնում է հայ գործարարին

Ընդամենը մեկ հպումով մուտք եվրոպական շուկա. ինչպես է ԵՄ-ն աջակցում էլեկտրոնային կոմերցիային Վրաստանում

Հպում՝ առևտրի համար. «EU4Digital»-ն օգնում է Ադրբեջանին էլեկտրոնային կոմերցիայի կարգի բերման գործում

7. Ի՞նչ է իրենից ներկայացնում նեթվորքինգը: Ինչպե՞ս է այն նպաստում էլեկտրոնային առևտրին

Նեթվորքինգը գործարար կապերի հաստատումը և էլեկտրոնային առևտրի ոլորտում միտումների ու գործունեության մասին տեղեկատվության փոխանակումն է: EU4Digital-ն էլեկտրոնային առևտրի բաղկացուցիչի շրջանակներում իրականացնում է բազմաթիվ գործողություններ ու պիլոտային ծրագրեր, որոնք անդրսահմանային համագործակցության պահանջ ունեն: Տեղեկատվության փոխանակումը, հետևաբար, կենսական պայման է էլեկտրոնային առևտրի հիմնախնդիրների վերաբերյալ իրազեկվածության բարձրացման, բարեփոխումների իրականացումը խթանելու և միջազգային շահագրգիռ կողմերի միջև գործունեության համահարթեցման համար:

Միջազգային նեթվորքինգային գործողությունները ներառում են պիլոտային լուծումների դիտարկման, ուսումնասիրման և քննարկման նպատակով ուսումնական այցեր, Արևելյան գործընկերության երկրների սահմաններից դուրս առկա լուծումներն ու լավագույն փորձի ուսումնասիրման նպատակով ուսումնական այցեր և կոնտակտներով ու էլեկտրոնային առևտրի ոլորտում միտումների վերաբերյալ տեղեկատվության փոխանակման միջոցառումներ: Այս միջոցառումները նախատեսված են քաղաքականություն մշակողների, ներդրողների, թվային տեխնոլոգիաների մատակարարների, ծառայություն մատուցող ընկերությունների, գիտահետազոտական կենտրոնների, գիտական կենտրոնների, բանկերի, ապահովագրական ընկերությունների, պետական կառավարման մարմինների, գործակալությունների և էլեկտրոնային առևտրի ոլորտի այլ շահագրգիռ կողմերի համար: Նեթվորքինգային գործունեության շրջանակներում վերջերս կազմակերպված միջոցառումների թվում են Թվային տրանսպորտի օրերը, «SEED» ճանաչողական այցը, «eDelivery» վիրտուալ ճանաչողական այցը Եվրոպա և այլն։

8. Հետագայում ի՞նչ տեսք կարող է ունենալ էլեկտրոնային առևտուրը տարածաշրջանում: Ինչպե՞ս է EU4Digital-ը նպաստելու դրան

EU4Digital-ի նպատակն էլեկտրոնային առևտրի ներդաշնակեցմանն աջակցելն է, որպեսզի այն դառնա անթուղթ, ավտոմատացված և ունիֆիկացված՝ տարբեր երկրների բիզնեսների և իշխանությունների միջև (առևտրային գործընթացների, հաղորդակցության, օրենսդրության և չափորոշիչների առումով): Այս սցենարին ավելի մոտենալու համար EU4Digital-ը նպաստում է վերլուծությունների իրականացմանն ու խնդիրների վեր հանմանը, միմյանց հետ կապում է համագործակիցներին, փորձարկում է եղած լուծումները և ներկայացնում է առաջարկություններ:

Առևտրի ապագայի առնչությամբ մենք կարող ենք աչքի առաջ ունենալ հետևյալ լավագույն սցենարը.

Ստոկհոլմում (Շվեդիա) տեղակայված բիզնեսը հենց նոր առևտրային համաձայնություն է ձեռք բերել Օդեսայում (Ուկրաինա) տեղակայված բիզնեսի հետ: Երկու բիզնեսների ներկայացուցիչները ծանոթացել են EU4Digital-ի կողմից կազմակերպված էլեկտրոնային առևտրին նվիրված միջոցառման ժամանակ: Ապրանքներն ընտրվել են էլեկտրոնային կոմերցիայի առցանց շուկայի, իսկ փաստաթղթերը փոխանակվել և ստորագրվել են համակարգչային ցանցերի միջոցով: Պայմանագրերը կնքվել են, իսկ հաշիվ-ապրանքագրերի վճարումը կատարվել է առանց թղթի գեթ մեկ կտորի օգտագործման: Այս փաստաթղթերի կառավարումը շատ արագ և հեշտ է ստացվել, քանի որ օրենսդրությունը և տեխնիկական չափորոշիչնրեը մոտարկված են: Սա նշանակում է, որ չկան այնպիսի լրացուցիչ փաստաթղթեր, որոնց մասին բիզնեսները տեղյակ չեն եղել կամ դրանց հետ գործ ունենալու փորձ չեն ունեցել:

Բիզնեսները պայմանավորվել են ձեռք բերված ապրանքը բեռնել Շվեդիայում (մեկնման երկիր), որը ծովային ճանապարհով հասել է մինչև Բալթիկ ծով, իսկ հետո Լիտվայի (տարանցման երկիր) Կլայպեդա նավահանգստում վերստին բեռնվել է բեռնատարի մեջ: Այնուհետև բեռնատարը ձեռք բերված ապրանքն առաքել է Ուկրաինայի (նշանակման երկիր) Օդեսա քաղաք:

Շվեդիայում ապրանքները բեռնելիս բիզնեսներն էլեկտրոնային եղանակով ներկայացրել են մաքսային փաստաթղթերը: Սա արվել է նախքան ապրանքների սահման հասնելը: Մաքսային մարմինը կարողացել է նախապես ուսումնասիրել փաստաթղթերը և կատարել ռիսկերի գնահատում: Շվեդիայի, ինչպես նաև տարանցման ու նշանակման երկրների մաքսային մարմինների համար հեշտ է եղել համագործակցելը, քանի որ գործընթացները (օրինակ՝ պահանջվող փաստաթղթեր, ձևաչափեր) և հաղորդակցության համակարգերը մոտարկված են: Այս ամենը մաքսային գործառնությունները դարձրել է արագ և անվտանգ: Փոխադրամիջոցի ներսում հայտնված ապօրինի որևէ բան չի կարող աննկատ մնալ գործողություններ իրականացնող մաքսային մարմինների աչքից:

Ապրանքները սկսել են իրենց ճանապարհորդությունը Շվեդիայից՝ օգտագործելով ծովային փոխադրամիջոց: Լիտվայի նավահանգիստ հասնելուն պես հեշտ և արագ է ստացվել ապրանքը ցամաքային փոխադրամիջոցի մեջ տեղափոխելը: Դրա պատճառը Բալթիկ ծովից մինչև Սև ծով ընկած թվային տրանսպորտային միջանցքն է: Առևտրային կողմերի համար դա նշանակում է, որ փաստաթղթերի փոխանակումը տեղի է ունեցել անմիջապես, ուստի ստուգման և համաձայնեցման գործընթացները ևս արագ են կազմակերպվել:

Ամեն անգամ, երբ բեռնատարը հասել է սահմանին, ճանապարհը շարունակելու հետ կապված որևէ ուշացում տեղի չի ունեցել: Քանզի մաքսային գործարքները կնքվել են ճանապարհ ընկնելու սկզբին, իշխանությունները միայն ստուգել են, թե արդյոք ապրանքը կնքված է: Բեռնատարը շարժվում է առաջ:

Ի վերջո, բեռնատարը ժամանել է Ուկրաինայի Օդեսա քաղաք: Ապրանքները կնիքազերծվել և ստուգվել են: Բաեհաջող առաքման փաստը հաստատվել է էլեկտրոնային եղանակով, որպեսզի շվեդական կողմը կարողանա հեշտությամբ հետևել առաքմանը:

Երկու ընկերություններն անհամբեր սպասում են գործարար համագործակցության հետագա հնարավորություններին: