Արևելյան գործընկերության գագաթնաժողովը ճանապարհ է հարթում տարածաշրջանում թվային փոխակերպման համար

  • Ամսաթիվ: 16/12/21
  • Կիսվել:

2021 թվականի դեկտեմբերի 15-ին Բրյուսելում հանդիպեցին Հայաստանի Հանրապետության, Ադրբեջանի Հանրապետության, Վրաստանի, Մոլդովայի Հանրապետության և Ուկրաինայի պետությունների կամ կառավարությունների ղեկավարները, Եվրոպական միության ներկայացուցիչները և վերջինիս անդամ երկրների պետությունների կամ կառավարությունների ղեկավարները:

Գագաթնաժողովի ընթացքում առաջնորդներն ընդունեցին համատեղ հռչակագիր, որում վերահաստատեցին նախորդ գագաթնաժողովներում և երկկողմ համաձայնագրերում իրենց ստանձնած հանձնառությունները, ինչպես նաև դրանք առաջ տանելու վճռականությունը: «Այս ճանապարհին մեր հավակնոտ բարեփոխումների օրակարգը և ընդլայնված համագործակցությունը շարունակում են լինել առաջընթացի և աջակցության անհրաժեշտ պայմանը. տարածաշրջանում բարեկեցության մակարդակի բարձրացում և խաղաղության, կայունության ու դիմակայունության ամրապնդում, հատկապես՝ COVID-19 համավարակի համատեքստում», – ասված է հռչակագրում:

Փաստաթուղթը նաև ընդգծում է թվային փոխակերպման կարևորությունը և ԵՄ-ի հանձնառությունը այս ոլորտում. «Մենք կձգտենք արագացնել թվային փոխակերպումը, ներառյալ ներդրումները թվային ենթակառուցվածքների և էլեկտրոնային կառավարման ոլորտներում։ Հիմնվելով տարածաշրջանային ռոումինգի համաձայնագրի վրա՝ մենք կշարունակենք ուսումնասիրել միջազգային ռոումինգի միասնական տարածքի, ներառյալ ԵՄ-ի և Արևելյան գործընկերության երկրների միջև ռոումինգի սակագների տնտեսապես կայուն նվազեցման հնարավորությունը»:

Հռչակագրում թվարկված են կայուն թվային փոխակերպման հիմնական ոլորտները՝ հաստատելով 2020 թվականից հետո ժամանակահատվածի համար Արևելյան գործընկերության առաջնահերթություններում սահմանված նպատակները.

Նախ՝ անհրաժեշտ է ամրապնդել էլեկտրոնային հաղորդակցության ենթակառուցվածքների անվտանգությունը, շարունակել պետական կառավարման և մասնավոր հատվածի դերակատարների թվայնացումը, ինչպես նաև իրականացնել ներդրումներ թվային նորարարությունների և թվային հմտությունների խթանման ուղղությամբ:

Հռչակագիրը սահմանում է նաև հետևյալ նպատակը. ԱլԳ տնային տնտեսությունների 80%-ը պետք է ունենան մատչելի գերարագ ինտերնետի հասանելիություն, իսկ հանրային ծառայությունների 80%-ը պետք է առցանց հասանելի լինեն փոխգործելիության հարթակների միջոցով: Այլ նպատակներից են՝ չորս գործընկեր երկրների և ԵՄ-ի միջև փոխադարձաբար ճանաչված թվային ստորագրությունները, ինչպես նաև թվային կրթական հարթակի ստեղծման միջոցով ԱլԳ մեկ միլիոն քաղաքացիների թվային կարողությունների ամրապնդումը:

Հռչակագրում նաև խոսք է գնում Տարածաշրջանային ռոմինգի համաձայնագրի (ՏՌՀ) և Տարածաշրջանային սպեկտրի համաձայնագրի (ՏՍՀ) իրականացացմանն աջակցության մասին. «Աջակցություն կցուցաբերվի գործընկեր երկրների միջև և, անհրաժեշտության դեպքում, ԵՄ-ի հետ ռոումինգի և սպեկտրի համաձայնագրերի իրականացմանը»: Փաստաթղթում նաև նշվում է, որ էապես կնվազեն միջազգային ռոումինգի մանրածախ գները, ինչպես նաև կապահովվի 5G ցանցերի աշխատանքը՝ շնորհիվ ԵՄ-ի հետ համաձայնեցված և համակարգված մոտեցման հետ։

Ինչ վերաբերում է էլեկտրոնային առևտրին, հռչակագրում ասվում է, որ զգալիորեն կավելանա ԵՄ-ի հետ անդրսահմանային էլեկտրոնային առևտուրը, ինչպես նաև կստեղծվեն չորս թվային տրանսպորտային միջանցքներ:

Զգալի ներդրումներ կուղղվեն նաև բարձր արդյունավետությամբ թվային ստարտափներին աջակցմանը:

Վերջապես, հռչակագիրը ներառում է տարածաշրջանի կիբերդիմակայունության և կիբերանվտանգության ամրապնդման, ինչպես նաև ինստիտուցիոնալ, քաղաքական և օրենսդրական շրջանակների խթանման ծրագիրը:

Գագաթնաժողովի մասնակիցներն ընդգծեցին, որ իրենք անհամբեր սպասում են 2023 թվականին կայանալիք Արևելյան գործընկերության հաջորդ գագաթնաժողովին, որը կլինի «նոր սերնդի առաջնահերթությունների և նպատակների իրականացման գնահատման և վերանայման առաջին հանգրվանը»:

ԱլԳ գագաթնաժողով 2021. համատեղ հռչակագիր

Նորություններ

Ցուցադրել բոլորը