Թվային հմտություններEU4Digital ակադեմիա

«EU4Digital» նախաձեռնության միջոցով Եվրոպական միությունը ձգտում է հիմքեր ապահովել Արեւելյան գործընկերության (ԱլԳ) երկրների մեկ միլիոն քաղաքացիների թվային կարողությունների զարգացման համար՝ թվային ուսուցման հնարավորությունների տրամադրման միջոցով: Թվային հմտությունների գծով ծրագրի գործունեության առանցքային ուղղություններն են փոքր եւ միջին ձեռնարկություններում (ՓՄՁ) թվային կոմպետենցիաների համակարգի ներդրման միջոցով թվային անջրպետի վերացումը եւ թվային փոխակերպման գործընթացի մոնիտորինգի որակի բարձրացումը։

Ի աջակցություն այս նպատակներին՝ «EU4Digital» ծրագրի II փուլը՝

• կնպաստի տարածաշրջանային կրթատեխնոլոգիական հարթակի զարգացմանը՝ հմտությունների փոխանցման լայն շրջանակ ներառող ուսումնական ծրագրով.
• կմշակի կոնկրետ երկրների համար նախատեսված մենթորական ծրագրերի խթանմանն ուղղված մեթոդաբանություններ՝ հիմնվելով ծրագրի I փուլի ընթացքում մշակված ՏՀՏ ոլորտում գենդերային հավասարության բացը վերացնելու ուղեցույցների վրա.
• կաջակցի Արեւելյան գործընկերության երկրներում ԵՄ թվային տնտեսության եւ հասարակության համաթվի (DESI) իրականացմանը:

Վերևում նշվածը հիմնված է ծրագրի I փուլի շրջանակում թվային հմտությունների ուղղությամբ գործունեության հաջողությունների վրա՝ ներառյալ ԱլԳ երկրներում թվային հմտությունների ուղղությամբ առկա բացերը չափելու եւ կանխատեսելու մեթոդաբանության մշակումը՝ համաձայն DESI-ի: Ստեղծվել է նաեւ ՓՄՁ-ների համար թվային կոմպետենցիաների համակարգ, ինչպես նաեւ աջակցություն է ցուցաբերվել երկրներում թվային հմտությունների եւ աշխատատեղերի ազգային կոալիցիաների ստեղծման գործընթացին:

Ծրագիրն աջակցում է EU4Digital-ի թվային հմտությունների ցանցի գործունեությանը, որի հիմնական առաջնահերթություններն են.

• Թվային հմտություններ քաղաքացիների համար.
• Թվային հմտություններ ՏՀՏ մասնագետների համար.
• Թվային հմտություններ ՏՀՏ ոլորտից դուրս գործող աշխատուժի, այդ թվում՝ ՓՄՁ-ների համար.
• Թվային հմտություններ կրթության ոլորտի համար (թվային հմտություններ դասավանդողների, երիտասարդների եւ ուսանողների համար).
• Թվային տնտեսության եւ հասարակության ցուցիչների չափում։

Թվային հմտությունները կենսական նշանակություն ունեն շարունակաբար թվայնացվող տնտեսությունների եւ հասարակությունների համար: EU4Digital-ի միջոցով թվային հմտությունների զարգացմանն ու չափմանն աջակցելով՝ ԵՄ-ն օգնում է հմտությունները համապատասխանեցնել զարգացող ոլորտների պահանջներին՝ նպաստելով աշխատատեղերի ավելացմանը, մասնավոր հատվածի զարգացմանը եւ դինամիկ տնտեսական աճին: