Wine Diamond — მრავალსაუკუნოვანი ქართული ტრადიციის მომავალი ელჩი ევროპაში

„მქონდა წინა ცხოვრება“, — ასე იწყებს საუბარს ჩვენი სტატიის მთავარი გმირი და ქართული ბრენდის Wine Diamond დამფუძნებელი
თამარ აბულაძე.

გსმენიათ ღვინის ქვების შესახებ? ეს გახლავთ ღვინის მჟავის კალიუმის მარილის კრისტალები, რომლებიც ფერმენტირებად ღვინოში ტემპერატურის დაცემისას გამოიყოფა და ჭურჭელზე რჩება. სხვადასხვა ფერის ქვები უმეტესწილად ფხვიერი კონსისტენციისაა და შაქარს ან მარილს მოგაგონებთ. თუმცა, ბზინვარე კრისტალებმა ბრილიანტის ასოციაციაც შეიძლება გაგიჩინოთ. ქართველი მეწარმის თამარ აბულაძისთვის ამის გაფიქრება იყო მეწარმეობის დასაწყისი, რასაც მოჰყვა ძიება ქართული ბრენდის შესაქმნელად და მის გასატანად ევროპულ ბაზარზე პროგრამის EU4Digital ელ-კომერციის საკონსულტაციო ცენტრის მცირე მხარდაჭერით.

Wine Diamond (“ღვინის ბრილიანტი”) — ასე ჰქვია ქართულ ბრენდს, რომელიც თამარ აბულაძემ 2021 წელს დააფუძნა. თუმცა, მეწარმეობის სურვილი ბევრად ადრე, „წინა ცხოვრების“ შემდეგ გაჩნდა. თამარმა ერთ-ერთ მსხვილ კორპორაციაში 20-წლიანი კარიერა დაასრულა და თავშესაქცევად ჯერ ნატურალური ქვებისგან დაიწყო სამკაულების დამზადება, მერე კი ღვინის სკოლაში სწავლას შეუდგა. მაშინ შეიტყო ღვინის ქვების შესახებაც და გადაწყვიტა, თავისი ახალი ინტერესები გაეერთიანებინა: რატომ არ შეიძლებოდა, რომ სამკაული ღვინის ქვისგან შეექმნა?

„რა სისულელეა, გამორიცხულია, არ გამოვაო, ასეთი რეაქცია ჰქონდათ მეღვინეებს, როცა ჩემი განზრახვის შესახებ მოვუყევი და ღვინის ქვები ვითხოვე“, — იხსენებს თამარი. მან ასევე აღმოაჩინა, რომ ღვინის ქვებისგან სამკაულების დამზადების პრაქტიკა მანამდე არ არსებობდა. თამარის მთავარი მიზანი გახდა სკეპტიკოსები დაერწმუნებინა, რომ დასახულ გეგმას შეასრულებდა. მიზნის მიღწევა კი არცთუ ადვილი მისია გახლდათ.

ათასი მცდელობა და პირველი წარმატება

ღვინის ქვებისგან სამკაულის შექმნა საკმაოდ რთული პროცესია და უაღრესად დიდ ყურადღებას მოითხოვს; მნიშვნელოვანია, რომ სამკაულში მოქცეულმა ღვინის ქვამ ავთენტიკური სახე, ფერი და სტრუქტურა შეინარჩუნოს. ამასთანავე, თითოეული ნივთი ნამდვილი სამკაული უნდა იყოს – მიმზიდველი, გამძლე და პრაქტიკული.  თამარს თავისი ჩანაფიქრის სისრულეში მოსაყვანად ბევრი მცდელობა დასჭირდა, თუმცა, საბოლოოდ მიაგნო დამზადების წარმატებულ ტექნიკას, რომელიც დღეს ექსკლუზიური და მკაცრად დაცული საიდუმლოებაა.

თამარის მოტივატორი გამომგონებელი თომას ედისონის გახდა, რომელსაც ნათურის შესაქმნელად ათასობით მცდელობა დასჭირდა. ასე დაიწყო ხანგრძლივი და შრომატევადი პროცესი. ამ პროცესს თამარი მარტო უძღვება და მხედველობასთან ერთად გონების დაძაბვაც უხდება, რომ სრულად იყოს კონცენტრირებული Wine Diamond-ის სამკაულებზე – ისინი უმთავრესად გვიან ღამით, ძლიერი განათების ქვეშ და სრული სიჩუმის ფონზე იქმნება.

თავისი მეუღლის მხარდაჭერით და ედისონის ბიოგრაფიით წახალისებულმა თამარმა მიზანს წარმატებით მიაღწია. 2021 წელს მან ღვინის ქვისგან დამზადებული პირველი სამკაული დაასრულა, რამაც ახალი ინოვაციური ქართული ბრენდის დაბადებას მისცა დასაბამი.

მაგრამ Wine Diamond-ის მიზანი მხოლოდ საიუველირო პროდუქციის წარმოება არ არის. თამარს სურს, რომ ბრენდს განსაკუთრებული დატვირთვა ჰქონდეს, სამკაულებმა დროს გაუძლოს და თაობიდან თაობას გადაეცეს. ამიტომაც შეარჩია სლოგანი „უკვდავება ღვინისა“, რომელიც მის სამშობლოში არსებულ მეღვინეობის მრავალსაუკუნოვან ტრადიციას ასახავს და Wine Diamond-ს  გამორჩეულ ქართულ ხასიათს ანიჭებს.   

სამკაულში მოქცეული 8000-წლიანი ისტორია

ღვინო ქართული იდენტობის განუყრელი ნაწილია ვაზის 525 ენდემური ჯიშით და ღვინის დაყენების უძველესი ტექნიკით – ქვევრით, რომელიც UNESCO-ს არამატერიალური კულტურული მემკვიდრეობის ნუსხაშია შეტანილი. ამ ყველაფრის წარდგენა, განსაკუთრებით უცხოელი მომხმარებლისთვის, და მისი ბრენდის 8000-წლიანი ტრადიციის ნაწილად პოზიციონირება თამარის ერთ-ერთი მთავარი მიზანი იყო.

ამ მჭიდრო კავშირის ხაზგასასმელად, Wine Diamond-ის ყველა პროდუქტს თან ახლავს ერთგვარი პასპორტი, რომელშიც თავმოყრილია ინფორმაცია როგორც ბრენდზე, ასევე საქართველოს მრავალსაუკუნოვან ტრადიციებზე. ეს აქცევს ბრენდს საქართველოს საუკეთესო „ელჩად“ ევროპულ ბაზარზე, სადაც პროგრამის EU4Digital ელ-კომერციის აქსელერატორის დახმარებით Wine Diamond-ის პროდუქცია ძალიან მალე გამოჩნდება.

გზა ევროპული ბაზრისკენ

ყველა თანამედროვე ბრენდის მსგავსად, Wine Diamond-ის შემთხვევაშიც მალევე გაჩნდა ექსპორტზე გასვლის სურვილი და საჭიროება. თავდაპირველად, თამარმა ამისთვის ონლაინ კომერციის პლატფორმა Etsy შეარჩია, მაგრამ მცდელობა მხოლოდ ანგარიშის შექმნით შემოიფარგლა. შემდეგ კი მეგობრისგან შეიტყო პროექტის EU4Digital შესახებ და ამ პროექტის ელექტრონული კომერციის აქსელერაციის პროგრამაში ჩართვა გადაწყვიტა.

ელექტრონული კომერციის საკონსულტაციო ცენტრი, რომელიც 2021 წლიდან ფუნქციონირებს, უფასო კონსულტაციებით და ტრენინგებით აქამდეც არაერთ ქართულ ბრენდს დახმარებია ევროპულ ბაზარზე გასვლაში. პროექტის EU4Digital გამოჩენა და მისი დახმარებით ონლაინ კომერციის განვითარება ძალიან დროული და სასარგებლო აღმოჩნდა Wine Diamond-ისთვის, განსაკუთრებით იმიტომ, რომ მას ჯერჯერობით არა აქვს მაღაზია ფიზიკურ სივრცეში.

პროგრამის ფარგლებში ბევრი საინტერესო რამ მოხდა, მაგრამ ჩემთვის ყველაზე სასარგებლო აღმოჩნდა პირადი კონსულტაციები, როდესაც დარგის ექსპერტებს ვხვდებოდი და უშუალოდ ჩემს ბრენდთან დაკავშირებულ რჩევებს და რეკომენდაციებს ვღებულობდი.

ამბობს Wine Diamond-ის დამფუძნებელი თამარ აბულაძე.

თამარმა რეკომენდაციების ხუთგვერდიანი ნუსხა მიიღო, რომელიც ევროპულ ბაზარზე Wine Diamond-ის სათანადოდ წარდგენაში უნდა დახმარებოდა.

რადგან მისთვის პრიორიტეტული Etsy იყო, თამარმა გაიარა კონსულტაციები ექსპერტთან, რომელიც ამ პლატფორმას კარგად იცნობს. მისგან მიიღო რჩევები, თუ რომელ პროდუქტებზე აიღოს ორიენტაცია, როგორ დაწეროს სათანადო აღწერები და  შეარჩიოს საუკეთესო ფოტოები. გარდა ამისა,  თამარმა გაიარა კონსულტაციები ციფრული მარკეტინგის სფეროში. ვინაიდან ესმის, რომ მისი შექმნილი პროდუქტი ძალიან გამორჩეული და უნიკალურია,  მომხმარებელსაც უნდა აუხსნას, თუ რა არის Wine Diamond და რატომ უნდა შეიძინოს იგი.

პროექტის EU4Digital ელ-კომერციის სფეროს ექსპერტი ვალერია კუზნიაცოვა

„გაიგე, რა გაინტერესებს“ — რჩევები დამწყებ მეწარმეებს

EU4Digital-ის კონსულტაციებიდან დაბრუნებულ თამარს დიდი გეგმები აქვს. ელექტრონული კომერციის განვითარების გარდა, მან თბილისში შოურუმის გახსნა გადაწყვიტა, სადაც წარმოდგენილი იქნება Wine Diamond და მისი სამი სხვა ბრენდი („ემოცია“, „ღვინის ემოცია და „მარილას პროდუქცია“). თამარს ასევე სურს, რომ თავის მომავალ თანამშრომლებს მზრუნველი გარემო შეუქმნას.  „წინა ცხოვრებაში“ მიღებული გამოცდილებიდან ახსოვს, რომ თანამშრომლების ბედნიერება პრიორიტეტულია.

ამასთანავე, თამარი სხვა ახალბედა მეწარმეებს რჩევებს სთავაზობს:

პირველ რიგში, დარჩით საკუთარ თავთან მარტო და გაიგეთ, რა გაინტერესებთ და რის კეთება მოგწონთ. როცა საქმეს შეიყვარებთ, მას მომხმარებელიც აუცილებლად მიიღებს. მეორე – აუცილებელია სათანადო ცოდნის მიღება, რის საშუალებასაც ხშირად ევროკავშირის მრავალმხრივი პროექტები იძლევა.

Wine Diamond-ის დამფუძნებელი თამარ აბულაძე

დასკვნის სახით თამარი ამბობს, რომ ყველაზე დიდია საშიშროება, დანებდე. ამიტომ, მოტივაციისთვის ახალბედა მეწარმეებს უკვე წარმატებული და გამოცდილი ადამიანების ისტორიის გაცნობას ურჩევს. „ედისონის ბიოგრაფიაც საკმარისია“, – დასძენს ღიმილით.

დამატებითი ინფორმაცია

ინიციატივა EU4Digital აღმოსავლეთ პარტნიორობის ქვეყნებს ელ-კომერციის პროცესის გამარტივებასა და ჰარმონიზაციაში ეხმარება, რაც უფრო ვრცელი საპროგრამო აქტივობის ნაწილია სახელმწიფოთაშორისი ელექტრონული ვაჭრობის მხარდასაჭერად. ამის შედეგად აღნიშნული ქვეყნები ევროკავშირის ერთიანი ციფრული ბაზრის ნაწილად იქცევიან. 

გაიგეთ მეტი ინიციატივის EU4Digital ელექტრონული კომერციის საკონსულტაციო ცენტრის შესახებ.

დამატებითი ინფორმაციის მისაღებად Wine Diamond-ის ისტორიის და პროდუქტების შესახებ, ეწვიეთ Wine Diamond-ის ვებსაიტს.

ამ ისტორიის უფრო ვრცელი ვერსია (ქართულ ენაზე) შეგიძლიათ იხილოთ ვებსაიტზე On.ge, სადაც ის თავდაპირველად დაიბეჭდა.