ՀՀ բարձր տեխնոլոգիական արդյունաբերության նախարարը ԵՄ պատվիրակության ղեկավարի հետ քննարկել է Հայաստան-ԵՄ համագործակցությանը վերաբերող հարցեր

ՀՀ բարձր տեխնոլոգիական արդյունաբերության նախարար Մխիթար Հայրապետյանն ընդունել է Հայաստանի Հանրապետությունում  Եվրոպական Միության (ԵՄ) պատվիրակության ղեկավար, դեսպան Վասիլիս Մարագոսին։ Հանդիպման ընթացքում կողմերը քննարկել են Հայաստան-Եվրոպական Միություն բազմակողմ համագործակցության օրակարգային հարցեր: Մասնավորապես, անդրադարձ է կատարվել ՀՀ-ԵՄ համապարփակ եւ ընդլայնված գործընկերության համաձայնագրի ներքո ամրագրված դրույթների իրականացմանը։

Երկուստեք պայմանավորվածություն է ձեռք բերվել խորացնելու համագործակցությունը թվայնացման, կիբեռանվտանգության, ինչպես նաեւ կիսահաղորդիչների նախագծման ոլորտում՝ Հայաստանը միկրոէլեկտրոնիկայի բնագավառի առաջատար երկրներից մեկը դարձնելու նպատակով։

Նախարար Հայրապետյանն իր խոսքում ընդգծել է Հայաստանի եւ Եվրոպական Միության միջեւ կարեւոր ու արդյունավետ համագործակցությունը՝ միտված տարածաշրջանում երկարատեւ խաղաղության ապահովմանը։ Մխիթար Հայրապետյանը ներկայացրել է ՀՀ Կառավարության կողմից մշակված «Խաղաղության խաչմերուկ» նախագծի սկզբունքները, այդ համատեքստում ընդգծել անդրսեւծովյան օպտիկամանրաթելային կապուղու կառուցման համար համապատասխան պայմանների ստեղծման անհրաժեշտությունը։

Լրացուցիչ տեղեկատվություն

Մանրամասները ներկայացված են ՀՀ բարձր տեխնոլոգիական արդյունաբերության նախարարության վեբկայքում հրապարակված մամուլի հաղորդագրության մեջ։