ՀՀ բարձր տեխնոլոգիական արդյունաբերության նախարարի տեղակալը հյուրընկալվել է Գյումրու տեխնոլոգիական կենտրոնում

ՀՀ բարձր տեխնոլոգիական արդյունաբերության նախարարի տեղակալ Ռուբեն Սիմոնյանը մայիսի սկզբին այցելել է Գյումրու տեխնոլոգիական կենտրոն (GTC), ծանոթացել կենտրոնի նախաձեռնություններին եւ այնտեղ գործունեություն ծավալող ընկերությունների աշխատանքներին: Փոխնախարարը մասնակցել է «Մարզերում մասնաճյուղ բացելու առավելությունները» խորագրով պանելային քննարկմանը։

Այցն ու պանելային քննարկումը կազմակերպել էր Առաջատար տեխնոլոգիաների ձեռնարկությունների միությունը (UATE)՝ UATE Member Meetup-ի շրջանակում։ Փոխնախարար Սիմոնյանի առաջին կանգառը EPAM Armenia-ն էր, որտեղ նա ծանոթացավ ընկերության ծրագրերին եւ կրթական նոր դասընթացներին: Հաջորդը՝ VOLO-ն եւ Fimetech-ն էին, որտեղ նրան ներկայացվեցին ընկերությունների առաջիկա նախագծերը։ Նախարարի տեղակալն այցելել է նաեւ «Popok Animation Studio», ծանոթացել ընկերության գործունեությանն ու ստուդայի աշխատանքներին, կազմակերպվող եռաչափ գրաֆիկայի եւ անիմացայի անվճար դասընթացներին:

Գյումրու տեխնոլոգիական կենտրոնը ստեղծվել է 2005 թվականին Ձեռնարկությունների ինկուբատոր հիմնադրամի, Հայաստանի Հանրապետության կառավարության եւ Համաշխարհային բանկի կողմից: Կենտրոնի նպատակն է զարգացնել տեխնիկական եւ բիզնես հմտությունները, խթանել տեխնոլոգիական ձեռներեցությունը եւ առեւտրայնացնել նորարարական հետազոտությունները: Կենտրոնն օգտագործում է տեխնոլոգիական կրթությունը տարածաշրջանում երկարաժամկետ աշխատանքի հնարավորություններ ապահովելու համար:

Լրացուցիչ տեղեկատվություն

Մանրամասները ներկայացված են ՀՀ բարձր տեխնոլոգիական արդյունաբերության նախարարության վեբկայքում հրապարակված մամուլի հաղորդագրությունում։