საქართველოს ქალაქებში კასპში, ბათუმსა და გურჯაანში ახალი ტექნოპარკები გაიხსნა

სამი ახალი ტექნოპარკი გაიხსნა საქართველოს ქალაქებში კასპსა და გურჯაანში, ასევე ბათუმში, რომელიც ქვეყნის მეოთხე უდიდესი ქალაქია. ტექნოპარკები გახსნა ეკონომიკის და მდგრადი განვითარების სამინისტროს ფარგლებში მოქმედმა საქართველოს ინოვაციების და ტექნოლოგიების სააგენტომ (GITA) მსოფლიო ბანკის ფინანსური მხარდაჭერით, რაც ასევე მოიცავს პირობებს პროფესიული განათლების სკოლებისთვის.

ტექნოპარკი წარმოადგენს ფიზიკურ სივრცეს, სადაც თავმოყრილია საგანმანათლებლო და პროფესიული რესურსები; ის არის ერთგვარი პლატფორმა ბიზნესის განვითარებისთვის ინოვაციის და ტექნოლოგიების საფუძველზე. ტექნოპარკი აძლევს საშუალებას სხვადასხვა ასაკის, პროფესიის და იდეების მქონე ადამიანებს, შეხვდნენ ერთმანეთს და გამოიყენონ შეთავაზებული ინფრასტრუქტურა ინოვაციური, ტექნოლოგიებზე დაფუძნებული პროდუქტების შესაქმნელად, რომლებიც კონკურენტუნარიანი იქნება როგორც ადგილობრივ, ისე საერთაშორისო ბაზრებზე.

კასპის, ბათუმის და გურჯაანის ტექნოპარკების გახსნის მიზანია ადგილობრივი მოსახლეობის, კერძო სექტორის წარმომადგენლების და მუნიციპალიტეტების მხარდაჭერა მანამდე ძნელად მისაწვდომი ტექნოლოგიების გამოყენებაში საკუთარი ბიზნესის განვითარებისთვის და ცოდნის მისაღებად, როგორც ინოვაციების და ტექნოლოგიების, ისე მეწარმეობის სფეროში.

თითოეულ ტექნოპარკში არის ე. წ. ფაბლაბები – ლაბორატორიები საწარმოო ინოვაციებისთვის უახლესი მოწყობილობით, როგორიცაა მაღალმწარმოებლური 3D პრინტერი, ლაზერული მჭრელი, პროგრამირებადი მანქანა, რიცხვული პროგრამული მართვის (CNC) მანქანა, ბარათული ბეჭდვის როუტერი, 3D სკანერი და სხვა; ტექნოპარკები დაკომპლექტებულია მაღალკვალიფიციური სპეციალისტებით დაინტერესებულ პირთა დასახმარებლად მოდელირებასა და საპილოტე მოდელის შექმნაში. გარდა ამისა, ახლად გახსნილი ტექნოპარკების ინფრასტრუქტურა მოიცავს ტრენინგის ცენტრებს, საკონფერენციო დარბაზებს, საერთო სამუშაო (თანამშრომლობის)  სივრცეებს სტარტაპერებისა და თვითდასაქმებული ადამიანებისთვის. ამ სივრცეებში შექმნილია ყოველგვარი პირობა, რომლებიც ხელს უწყობს სტარტაპების განვითარებას.