ციფრული სატრანსპორტო დერეფანი ტვირთის ტრანსპორტირების შესახებ ელექტრონული ინფორმაციის (eFTI) დანერგვით წარმოადგენს ლოგისტიკურ მონაცემთა გაცვლას მთელი ქვეყნის ფიზიკური სატრანსპორტო დერეფნების გასწვრივ, რომლებიც გზებს, რკინიგზებს და ქვეყნის შიდა წყლითსავალ გზებს მოიცავს.

ეს აუცილებელია, რადგან ლოგისტიკის ბიზნესი, რომელიც აწარმოებს საქონლის და სერვისების ტრანსპორტირებას სხვადასხვა ქვეყნის საზღვრებს შორის, უნდა ურთიერთქმედებდეს სხვადასხვა სახის ლოგისტიკურ სისტემებთან. ქაღალდის დოკუმენტებზე დაყრდნობა აღმოსავლეთ პარტნიორობის სხვადასხვა ქვეყნებსა და ევროკავშირში ქმნის ბარიერებს, რომლებიც აფერხებს ლოგისტიკური ინფორმაციის დაუყოვნებლივ გაცვლას ქვეყნებს, ეკონომიკური საქმიანობის სუბიექტებს და ხელისუფლებას/ადმინისტრატორებს შორის. გარდა ამისა, შემუშავების პროცესში მყოფი საკანონმდებლო ჩარჩოები ლიგისტიკური პროცესებისა და საინფორმაციო სისტემებისთვის ყველა ქვეყანაში ერთნაირი არ არის, რაც ლოგისტიკურ პროცესებს კიდევ უფრო ახანგრძლივებს და ართულებს. ამის შედეგია ლოგისტიკის ფასების ზრდა და შეფერხებები საქონლის და სერვისების მიწოდებაში. 

ლოგისტიკაში ინფორმაციის გაცვლის პროცედურების სტანდარტიზაციისა და გამარტივების მიზნით, ევროკავშირი ამჟამად ნერგავს უნიფიცირებულ საკანონმდებლო ჩარჩოს ელექტრონული ტვირთის სატრანსპორტო ინფორმაციის გაცვლის რეგულირებისთვის – ტვირთის ტრანსპორტირების შესახებ ელექტრონული ინფორმაციის (eFTI) რეგულაციას, რომელიც ძალაში შევა 2026 წელს. პროგრამის EU4Digital ელ–ვაჭრობის თემატური სფეროს ფარგლებში იქმნება სამოქმედო გეგმა ანალოგიური სისტემის დასანერგად აღმოსავლეთ პარტნიორობის ქვეყნებში. ამ ქვეყნებისთვის eFTI-ს მსგავსი სისტემის დანერგვა არა მარტო უზრუნველყოფს დაცული, გამჭვირვალე და ეფექტიანი ლოგისტიკური ინფორმაციის გაცვლას ხელისუფლებასა და ბიზნესს შორის, არამედ ასევე გააძლიერებს სავაჭრო ურთიერთობებს ევროკავშირის ქვეყნებთან საქონლის შეუფერხებელი სახელმწიფოთაშორისი ტრანსპორტირების საშუალებით.